UĦM Voice of the Workers rikonoxxuta uffiċjalment bħala r-rappreżentanta tal-ħaddiema tal-MPT

UĦM Voice of the Workers kisbet ir-rikonoxximent uffiċjali biex tirrapreżenta lill-ħaddiema  tal-Malta Public Transport (MPT) waqt konferenza tal-aħbarijiet li saret fil-Head Office tal-MPT f’Ħal Qormi lbieraħ filgħodu.

Dan ir-rikonoxximent ġie attwat permezz ta’ ittra uffiċjali  li ġiet preżentata minn Julio Tironi, direttur  ta’ Autobuses de Leon,  lil Josef Vella,  Kap Eżekuttiv ta’ UĦM Voice of the Workers.

Josef Vella, Kap Eżekuttiv ta’ UĦM Voice of the Workers qal li dan il-ftehim hu avveniment importanti għall-UĦM, għall-ħaddiema membri tal-MPT kif ukoll għall-kumpanija nnifisha. Hu stqarr li, sa fl-aħħar, il-kumpanija tat il-hand-over uffiċjali lil UĦM Voice of the Workers sabiex din il-union  tibda tinnegozja dwar il-ftehim  kollettiv tal-ħaddiema. Il-Kap Eżeluttiv ta’ UĦM Voice of the Workers qal li l-proċess kollu mistenni  jintemm fi  żmien tliet  xhur  oħra.

Konrad Pule’, il-General Manager ta’  MPT  qal li dan l-għarfien  trejdunjonistiku hu kisba kbira għall-MPT u għall-ħaddiema. Hu stqarr li l-pass li  jmiss hu li tibda d-diskussjoni dwar pjan għat-tisħiħ tal-kundizzjonijiet  tax-xogħol.

Preżenti għall-ftehim ta’ rikonoxximent ilbieraħ kien hemm ukoll Jesmond Bonello, Direttur u Kenneth Abela, Employment Relations Manager, għan-nom  ta’ UĦM Voice of the Workers.